Tuesday, February 11, 2014

Lotte Nishanthi Winther heldur fyrilestur um Jorn og Pollock


Jorn & Pollock – Kollveltingarleiðir

Í annaðkvøld, mikukvøldið 12.februar verður ein spennandi fyrilestur í Listasavni Føroya um tveir stórar listamenn, danska Asger Jorn og amerikanska Jackson Pollock. Tað er Lotte Nishanthi Winther, sum fer at greiða frá, hon er listfrøðingur mag. art. og granskari á framsýningini Jorn & Pollock - Kollveltingarleiðir, sum Louisiana sýnir fram í løtuni í Humlebæk, DK. 


Hon hevur verið við til at skriva stóru bókina, sum kom út í sambandi við framsýningina, og síðsti partur av bókini er skrivaður á Nesi, har Lotte Nishanthi Winther býr saman við synum sínum og manninum, hann er jazzpianistur og starvast í løtuni sum organistur í kirkjuni í Hvalba og á Tvøroyri. Lotte er ættað úr Føroyum í móðirætt, abbin var sandoyingur. Fyrilesturin í Listasavninum byrjar klokkan sjey.

Asger Jorn og Jackson Pollock eru tveir av teimum mest týðandi listamonnunum í listasøguni í 20. øld. Í 1943-1963 verða teirra verk allýst sum, at ein nýggjur spontanur, abstraktur málningur verður til. Við teirra dryppum, slettum og skvettum við málingini fáa teir altjóða uppmerksemi. Teir hittust ongatíð, men tvørtur um Atlantshav hava teir felags stremban og íblástur í surrealismu og sonevndari frumkendari list. Verkini hjá Jorn og Pollock eru fyri fyrstu ferð sett saman á einari framsýning, sum verður víst í Louisiana Museum for Moderne Kunst. Fyrilesturin varpar ljós á hugmyndirnar handan listina og viðger ymiskar tættir í teirra verkum.





(KP)