Sunday, July 14, 2013

Úrmælingaprent til gávus


Eg var í Steinprenti í gjár og møtti har listamanninum Mariusi Olsen, sum var í gongd við at gera ársins gávuprent til limirnar í Steinbrá. Enn er bara steinurin liðugur, men tað sær longu ógvuliga spennandi út, so eg gleði meg at síggja royndarprentið í morgin. Marius Olsen hevur teknað og laverað, so at eftir standa 8 myndir á steininum, sum limirnir í Steinbrá fara at kunna velja í millum. Myndevnini eru ymisk og rættiliga eyðkend fyri listamannin, sum ofta lýsir menniskju og lands- og býarløg á sín egna serstaka hátt, har kompositiónin saman við presisiónini í strikuni og muninum millum hvítt og svart ala fram eitt gátuført, tættað huglag. Hesa ferð er eisini millum myndevnini ein fitt lítil finsk chinchilla, sum býr heima hjá Marius og unnustuni.


Her síggjast myndirnar eitt sindur betri. Tað góða er, at øll kunnu vera limir í Steinbrá, sum er sjálvstøðugt grafiskt áhugafelag við endamálinum at stuðla virkseminum í Steinprenti. Hevur tú allarminsta áhuga fyri myndlist, er limaskapur í Steinbrá eitt mást og øll eru hjartans vælkomin at tekna limaskap við at rinda limagjald á konto í Norðoya Sparikassa 9865-1042496, e-mailadressan er: hjalmarsdottir.didriksen@gmail.com. Limagjaldið er 500 kr fyri einstaklingar og 2000 krónur fyri fyritøkur og fyri tað kanst tú velja tær grafikk (til tín sjálvan, fornemt at brúka eisini sum gávur) umframt, at tú fært tey fínu gávuprentini ókeypis og fært innbjóðingar til listafilmir, framsýningar og fyrilestrar. 





(KP)