Jóanes Nielsen, Kristian Blak og Sakaris Fríði Stórá fáa ársins mentanarvirðislønir. Jóanes fær ta stóru mentanarvirðislønina fyri ritverk sítt, Kristian fær heiðurslønina fyri tónleikin og Sakaris Fríði Stórá fær heiðursløn, sum verður latin gávuríkum ungum listafólki. Tó at allir virðislønarmóttakararnir eru sera ymiskir, eru teir markantir á hvørjum sínum mentanarøki. Virðislønirnar eru væl uppibornar og vit ynskja móttakarunum hjartaliga til lukku. Tíðindaskrivið er her:
| Landsstýrismaðurin í mentamálum, Bjørn Kalsø, hevur gjørt av, hvør skal hava Mentanarvirðisløn Landsins fyri 2011, Heiðursgávu Landsins fyri 2011 og sum nakað nýtt ”Virðisløn til ungt listafólk fyri 2011.” Virðislønirnar verða latnar við heimild í løgtingslóg og kunngerð um stuðul til mentan og list, og serstøk játtan er á fíggjarlógini. Ein virðislønarnevnd við fimm limum ger tilmæli til landsstýrismannin. Mentanarvirðisløn Landsins Mentanarvirðisløn Landsins verður latin føroyskum mentafólki sum tøkk fyri útint listaligt avrik. Til tess at fáa mentanarvirðislønina skal móttakarin hava skapað listaverk á høgum støði. Mentanarvirðisløn Landsins 2011 verður latin Jóanesi Nielsen, rithøvundi, fyri í skaldskapi sínum at vera alt í senn: Hittinorðaður og hvassorðaður, myndaríkur og humoristiskur, inniligur og kensluríkur. Á henda hátt hevur Jóanes Nielsen í mong ár víðkað og ríkað føroyska bókmentapallin. Mentanarvirðisløn Landsins er kr. 150.000,-. Heiðursgáva Landsins Heiðursgáva Landsins verður latin mentafólki, ið hevur virkað til frama fyri mentanarlig virði, sum hava týdning fyri føroyska mentan, list og mentanararv. Heiðursgáva Landsins 2011 verður latin eldsálini og tónasmiðinum, Kristiani Blak, fyri ótroyttiliga at hava virkað til frama fyri føroyska tónleikapallin og fyri at fáa føroyskan tónleik út í heim. Heiðursgáva Landsins er kr. 75.000,-. Virðisløn til ungt listafólk Landsstýrismaðurin kann eftir egnum vali lata aðrar heiðursgávur enn tær omanfyri nevndu. Tilmælisnevndin hevur mælt til at nýta henda møguleika í ár og at lata ungum listafólki virðisløn. Virðislønin er ætlað ungum listafólki sum kveikjan, stimbran og stuðlan. Landsstýrismaðurin hevur gjørt av at lata ”Virðislønina til ungt listafólk 2011” til tann 25-ára gamla, evnaríka skopuningin, filmslistamannin Sakaris Stórá fyri at hava sýnt serliga góð evni innan filmslist. Virðislønin til ungt listafólk er kr. 50.000,-. Virðislønir handaðar 15. januar 2012 Landsstýrismaðurin í mentamálum, Bjørn Kalsø, handar virðislønirnar á almennum tiltaki á Tjóðpalli Føroya, sunnukvøldið 15. januar 2012, kl. 20.00. Tórshavn, 13. desember 2011 Mentamálaráðið |
