Monday, October 18, 2010

Vencilvika - So tú vilt vera rithøvundur?


Charles Bukowsky

Henry Charles Bukowsky (Heinrich Karl Bukowski) varð føddur í Týsklandi hin 16.august í 1920 og setti seinasta glasið frá sær 9. mars í 1994. Trý ára gamal flutti hann saman við mammu og pápa sínum til USA.

Charles Bukowski er ein serstakur rithøvundur í amerikanskari bókmentasøgu og bókmentum. Hann hevur altíð verið egin. Alt lívið brúkti hann at skriva, drekka, horast, vedda og av og á hevði hann okkurt fyrifallandi arbeiði fyri at tjena sær nøkur oyru.

Allur skaldskapur hansara er biografiskur og tekur støðið í lívsførsluni og teimum fólkum, hann helt saman við.

Hann hevði greiðar meiningar um aðrar høvundar.http://www.youtube.com/watch?v=r1e5Jeh2Fk0

Eisini var hann ein góður upplesari.http://www.youtube.com/watch?v=zSo9_iVc9Cs


Í Vencli 9.eru fimm yrkingar eftir Charles Bukowski. Tvær teirra hevur Agnar Artúvertin týtt og tríggjar hevur Petur Pólson týtt.

Vit prenta her eina.


so tú vilt vera rithøvundur?
(so you want to be a writer?)


kemur tað ikki brestandi úr tær

hóast alt sum mótvirkar,

so ger tað ikki.

uttan so at tað kemur óboðið úr tínum

hjarta og tínum sinni og tínum munni

og tínum innvølum,

so ger tað ikki.

situr tú fleiri tímar og starir at

telduskíggjanum ella boygdur yvir

skrivimaskinuna og grópar eftir orðum,

ger tað ikki.

gert tú tað fyri pening ella

viðurkenning,

ger tað ikki.

gert tú tað fyri at fáa kvinnur

í tína song,

so ger tað ikki.

noyðist tú at sita har og

endurskriva tað umaftur og

umaftur og aftur,

so ger tað ikki.

er tað ein strævin byrða bert at

hugsa um at gera tað,

ger tað ikki.

roynir tú at skriva sum

onkur annar,

gloym so alt um tað.



mást tú bíða til tað

floymir úr tær,

so bíða tolin.

kemur tað ongantíð

floymandi úr tær,

so ger okkurt annað.



skalt tú fyrst lesa tað fyri

konuni, dámuni ella sjeikinum

ella foreldrunum ella nøkrum

øðrum yvirhøvur,

ert tú ikki til reiðar.



ver ikki sum so mangir høvundar,

ver ikki sum fleiri túsund menniskju

sum rópa seg høvundar.

ver ikki tryggur og keðiligur og

sjálvglaður, ver ikki uppetin

av sjálvalski.

heimsins bókasøvn hava

geispað seg í svøvn

av tínum slagi,

legg ikki afturat tí.

ger tað ikki.

kemur tað ikki úr sál tíni sum missil.

uttan so at vera kúrrur gjørdi teg

svakan ella sjálvmordara ella drápsmann,

so ger tað ikki.

uttan so at sólin innaní tær

brennur tínar innvølir,

so ger tað ikki.



tá tíðin er komin,

og um tú ert kosin,

vil tað henda av sær

sjálvum og halda á

at gera tað til tú doyrt

ella tað doyr

í tær.



tað er ongin annar háttur.



og hevur aldri verið.



Petur Pólson týddi