Øðrvísi bygdarlív

Randi Ward

Norræna Húsið í Reykjavík 31. juli -21. august, 2010.

Leygardagin 31. juli 2010 letur Norræna Húsið í Reykjavík upp fotoframsýningina
"bygdarlívið" eftir Randi Ward, sum síðsta ár hevði nakrar áhugaverdar fotomyndir við á Ólavsøkuframsýningini av rustaðum tekjum og slitnum hurðum, ið góvu eina øðrvísi mynd av bygdarlívinum enn vit eru von við og tað vóru júst hesar myndirnar, ið góvu Randi Ward hugskotið til at gera eina fotoframsýning, ið nú verður framsýnd í Reykjavík. Randi Ward er fødd í West Virginia í USA í 1982, men hon hevur búð í Føroyum, har hon nam MA í mentanarvísindum á Fróðskaparsetri Føroya í 2007. Sama ár gav hon út eina bók við yrkingum og fotomyndum. Listin hevur móttikið tíðindaskriv um framsýningina:

Myndirnar í bygdarlívinum eru tiknar í ymsum bygdum runt um í Føroyum. Ætlanin er, at tær skulu mæla
ímóti tí romantisku umrøðuni, sum er vanlig hjá fólki, tá ið tey lýsa Føroyar og føroysku bygdirnar – t.e. sum ævintýrakend støð, har ið tíðin stendur still, og øll liva í samljóði í utopiskum fjarskotni.

Framsýningin bygdarlívið sáar iva um hesa sjálvsøknu umrøðu, meðan hon samstundis finst at teimum niðurbrótandi eindunum, sum eru í tí sosiala bygnaði og mátti, sum eyðkennir eitt samfelag. Í hvørji mynd í bygdarlívinum síggjast myndlig drøg av ovlýsing, forfalli og órøkt, og hvør mynd er bygd upp soleiðis, at hon er á tremur við ørkymlandi symbolismu: gisnaðar hurðar, sum ikki longur kunnu latast upp, brotin ella fyrinegld vindeygu, upptærd hongsil og naglar og tekjur, sum reyð av rusti stríðast fyri at halda uppi skili, formi og virki. Í bygdarlívinum er tann litfagra heildin og tað óslítandi sambandið millum ymisk sløg av fatanum, skipanum og afturgongd alla tíðina til staðar, men tey einastu fólkini, sum vit síggja á teimum innrammaðu myndunum, eru tey, ið skoða at myndunum… meðan teirra avskeplaðu frásjónir og andlit verða varpað aftur til teirra til umhugsanar.

Fotoframsýningin varir til 21. august.

http://www.randiward.com/

http://www.nordice.is/norraena-husid/frettir/nr/553